ភ្នំពេញ៖ មន្ត្រីជាន់ខ្ពស់ក្រសួងពាណិជ្ជកម្មថៃ និងមន្ត្រីជាន់ខ្ពស់សភាឧស្សាហកម្មរបស់ខ្លួន បានធ្វើដំណើរទៅកាន់ប្រទេសឡាវ, កម្ពុជា, និងវៀតណាម ដើម្បីផ្សព្វផ្សាយអំពីការតាំងពិព័រណ៍ និងអញ្ជើញអ្នកចូលពីប្រទេសទាំង៣ ឲ្យចូលរួមពិព័រណ៍ម៉ាស៊ីនត្រជាក់ ទូរទឹកកក និងគ្រឿងអេឡិចត្រូនិក (Bangkok RHVAC &Bangkok E&E 2019) ដែលនឹងរៀបចំរយៈពេល៤ ថ្ងៃនៅក្នុងប្រទេសថៃ។
ការបង្ហាញនេះ ក្នុងសន្និសីទសារព័ត៌មានមួយ ដោយមានការអញ្ជើញម្ចាស់អាជីវកម្ម និងអ្នកជំនួញលើគ្រឿងអេឡិចត្រូនិកនៅកម្ពុជាទៅចូលរួមពិព័រណ៍«ម៉ាស៊ីនត្រជាក់ ទូរទឹកកក និងគ្រឿងអេឡិចត្រូនិក ២០១៩» ដែលនឹងរៀបចំឡើងនៅថ្ងៃទី២៥-២៨ ខែកញ្ញា ឆ្នាំ២០១៩ នៅសាលប្រជុំ និងពិព័រណ៍ BITEC,BANGNA ទីក្រុងបាងកក។ ដោយរំពឹងយ៉ាងខ្ពស់ថា ពិព័រណ៍នឹងមានពាណិជ្ជករ និងភ្ញៀវមកពីប្រទេសអាស៊ាន និងទូទាំងពិភពលោកចូលរួម ទស្សនារាប់ម៉ឺននាក់ផងដែរ។
លោក វិបៈយ៉ាកន មុនីណេត អគ្គនាយករងនៃអគ្គនាយកដ្ឋានជំរុញពាណិជ្ជកម្មអន្តរជាតិ និងជាអ្នកដឹកនាំគណៈប្រតិភូថៃ មកផ្សព្វផ្សាយពិព័រណ៍បានថ្លែងនៅព្រឹកថ្ងៃទី១៦ ខែមករា ឆ្នា២០១៩ថា ពិព័រណ៍ Bangkok RHVAC & Bangkok E&E 2019 មានការរីកចំរើនជាបន្តបន្ទាប់។
លោកបន្តថា នៅឆ្នាំដំបូងទំហំអាគារសំរាប់រៀបចំពិព័រណ៍មានត្រឹមតែ១៩,០០០ម៉ែត្រប៉ុណ្ណោះ ហើយមកដល់ពេលនេះ អាគារសំរាប់តាំងពិព័រណ៍ ត្រូវបានពង្រីកដល់២៣,០០០ម៉ែត្រ ហើយសម្រាប់ឆ្នាំនេះ រំពឹងថា នឹងមានក្រុមហ៊ុន៤០០ ជាមួយនឹង ១,០០០ស្តង់ ដែលមានភ្ញៀវចូលទស្សនាជាង១៤,០០០នាក់ផងដែរ។
លោកបន្ថែមថា ពិព័រណ៍ Bangkok RHVAC & BangkokE&E ត្រូវបានចាត់ទុកជាពិព័រណ៍ ដែលមានសក្តានុពលសំរាប់ ឧស្សាហកម្មទាំងប្រទេសថៃ។ ប្រទេសថៃជាមជ្ឈមណ្ឌលផលិត ទំនិញ, ម៉ាស៊ីនត្រជាក់, ទូរទឹកកក និងឧបករណ៍អេឡិចត្រូនិកដ៏សំខាន់ក្នុងពិភពលោក។ បច្ចុប្បន្នប្រទេសថៃ គឺជាអ្នកផលិត Hard Disk Drive លំដាប់លេខ១ទូទាំងពិភពលោក និងជាអ្នកផលិតម៉ាស៊ីនត្រជាក់លំដាប់លេខ២ផងដែរ។
លោកបន្ដថា ប្រទេសថៃក៏មានការនាំចេញទំនិញ អេឡិចត្រូនិកទៅកាន់ទីផ្សារធំៗដូចជា៖ អាស៊ាន ,អាស៊ី និងមស្ចឹមបូព៌ា ដោយគិតជាភាគរយស្មើនឹង៦៣.២០ភាគរយនៃការនាំចេញទំនិញអេឡិចត្រូនិក៕
